NJOFTIM PËR NJË VEND VAKANT PËR PERSONEL ADMINISTRATIV NË POZICIONIN E PUNËS “ SPECIALIST NË DEGËN E FINANCËS”, NË FAKULTETIN E MJEKËSISË DENTARE TË UNIVERSITETIT TË MJEKËSISË, TIRANË

Bazuar në ligjin nr. 80/2015, “Për arsimin e lartë dhe kërkimin shkencor në institucionet  e arsimit të lartë në Republikën e Shqipërisë”, në Vendimin e Bordit të Administrimit të Universitetit të Mjekësisë, Tiranë me nr. 63, datë 08.10.2021 “Për miratimin e kritereve të punësimit të personelit administrativ të Universitetit të Mjekësisë, Tiranë” i ndryshuar, në mbështetje të shkresës së Fakultetit të Mjekësisë Dentare nr. 521/4 prot., datë 01.12.2023 “Dërgohet proces-verbal i komisionit të vlerësimit për personel administrativ “Specialist i Degës së Financës” në Fakultetin e Mjekësisë Dentare”, protokolluar me tonën nr. 3092/5 prot., datë 01.12.2023, si dhe në Urdhrin e Administratorit të UMT-së nr. ­282, datë 06.12.2023, Universiteti i Mjekësisë, Tiranë shpall konkursin për një vend vakant pune, si më poshtë:

Për një vend vakant për personel administrativ në pozicionin e punës “ Specialist në Degën e Financës”, në Fakultetin e Mjekësisë Dentare të Universitetit të Mjekësisë, Tiranë,

Përshkrimi përgjithësues i punës:

• Ndjek dhe zbaton të gjitha procedurat të lidhura me veprimet që gjenerojnë shpenzimet dhe të ardhurat dhe garanton përputhshmëri me ligjin.
• Ndjek dhe kryen regjistrimet në librat e llogarisë të të gjitha veprimeve që lidhen me të ardhurat.
• Ndjek dhe kryen regjistrimet në librat e llogarisë të të gjitha veprimeve që lidhen me shpenzimet e njësisë kryesore.
• Regjistron në bazë të dokumentacionit, të gjitha veprimet ekonomike financiare në mënyrë kronologjike dhe sistematike në regjistrat kontabël, ditarë:(ditari i shpenzimeve, ditari i bankës, ditari i magazinës, ditari i pagave, ditari i veprimeve të ndryshme)
• Përgatit e përpilon situacionet e raportimit të të ardhurave dhe shpenzimeve si njësi, si dhe tabelat e raportimit progresiv, periodikisht çdo 4-mujor.
• Mban dhe azhornon në mënyrë kronologjike gjendjen e Aktiveve të Qëndrueshme, kartelat e AQT-ve në përdorim ( zyrë dhe çdo punonjës ) për njesinë kryesore si dhe llogarit amortizimin e tyre.
• Mban, azhornon dhe kontabilizon të gjitha veprimet e magazinës dhe përgatit të gjitha raportet mujore të gjendjes.
• Mban dhe azhornon dhe kontabilizon të gjitha veprimet e pagave të punonjësve dhe të gjitha detyrimet që rrjedhin prej tyre (sig.shoqërore, pensionet etj.)
• Raporton për punën e kryer dhe problemet e konstatuara përpara kryetarit të degës.
• Realizon çdo detyrë tjetër të ngarkuar nga eprorët.
• Detyrat e tjera janë specifikuar në rregulloren e përgjithshme.

Kërkesa të përgjithshme:

1. Të jetë shtetas shqiptar;
2. Të ketë zotësi të plotë për të vepruar;
3. Të plotësoj kërkesat e posaçme për nivelin e arsimit, përvojës dhe kërkesat e tjera të posaçme për kategorinë, klasën, grupin dhe pozicionin përkatës;
4. Të mos jetë i dënuar me vendim të formës së prerë për kryerjen e një krimi apo për kryerjen e një kundërvajtje penale me dashje;
5. Të mos jetë marrë ndaj tij ndonjë masë disiplinore, që nuk është shuar sipas ligjit;
6. Ndaj tij të mos jetë marrë ndonjë masë disiplinore për largimin nga puna;
7. Të jetë në kushte shëndetësore të mira për të kryer detyrat përkatëse;
8. Të ketë vlerësime pozitive të përvojave të mëparshme të punës;
9. Të zotëroj gjuhën shqipe të shkruar dhe të folur;

Kriteret:

1. Të zotërojnë diplomë të nivelit “Master Shkencor” ose “Master Profesional” ose “Bachelor” në Shkenca Ekonomike;
2. Të ketë 1 vit eksperiencë pune në profesion;
3. Aftësi të mira kompjuterike, njohja e programeve bazë;
4. Njohuri të gjuhës së huaj anglisht dhe/ose ndonjë gjuhë tjetër;

Dokumentacion i kërkuar:

Kandidatët që aplikojnë, duhet të dorëzojnë dokumentat si më poshtë:

1. Kërkesë me shkrim për aplikim;
2. Jetëshkrim (CV) sipas formatit standard (europass) i përditësuar;
3. Fotokopje të pasaportës ose kartës së identitetit (ID);
4. Kopje të noteruar e diplomës/diplomave dhe/ose njësimin e tyre në MAS (për diplomat e marra jashtë vendit), bashkë me listë notash të noteruara (për ciklet përkatëse të studimit, sipas rastit);
5. Kopje e librezës së punës e noteruar (të gjitha faqet që vërtetojnë përvojën në punë);
6. Kopje e noterizuar e dëshmisë së njohjes së programeve bazë, kompjuterike;
7. Vërtetim i gjendjes shëndetësore (raport mjekësor për aftësinë në punë);
8. Formular vetë deklarim sipas formës së kërkuar nga ligji;
9. Vërtetim i gjendjes gjygjësore (Dëshmi Penaliteti), të marrë brenda (tre muajve të fundit);
10. Vërtetim nga punëdhënës të mëparshëm, që nuk ka masë disiplinore në fuqi;
11. Dëshmi të njohjes së gjuhës së huaj të noteruar;
12. Dokument tjetër që vërteton trajnimet, kualifikimet, arsimin shtesë apo të tjera të përmendura në jetëshkrim;
13. Referenca nga punëdhënës të mëparshëm, që provojnë vlerësimet pozitive në punë;

Mungesa e një prej dokumentacioneve të kërkuara më sipër, sjell s’kualifikim të kandidatit.

Dokumentacioni i dorëzuar nuk do të kthehet mbrapsht, pasi bëhet pjesë e Arkivës së Institucionit.

Kandidatët e interesuar, duhet të dorëzojnë me procesverbal dokumentacionin e kërkuar origjinal ose të njësuar me origjinalin në Sektorin e Protokoll- Arkivës, në Universitetin e Mjekësisë, Tiranë (Adresa: Rruga e Dibrës, Nr.371, 1005, Tiranë).

Afati i dorëzimit të dokumentacionit: është  15 ditë kalendarike nga dita e shpalljes në Buletinin e APP-së.

 Përzgjedhja e kandidatit fitues do të bëhet nëpërmjet konkurrimit me dosje dhe me intervista të drejtë për drejta. Për çdo paqartësi mund të dërgohet e-mail në adresën info@umed.edu.al

Fusha e njohurive, aftësive dhe cilësitë të cilat do të zhvillohet intervista:

• Njohuritë mbi Ligjin nr.80/2015 “Për arsimin e larte dhe kërkimin shkencor në IAL në RSH”
• Njohuritë mbi Ligjin nr 44/2015 “Kodi i Procedurave Administrative i Republikës së Shqipërisë”;
• Njohuri mbi ligjin nr. 9936, datë 26.06.2006 “Për menaxhimin e sistemit buxhetor në Republikën e Shqipërisë”, i ndryshuar;
• Njohuri të akteve nënligjore në fuqi për fushën e procedurave financiare e administrative.

Mënyra e vlerësimit:

Në lidhje me dokumentacionin e dorëzuar kandidatët do të vlerësohen për përvojën, trajnimet apo kualifikimet e lidhura me fushën.

Në lidhje me intervistën e punës kandidatët do të vlerësohen për njohuritë, aftësitë, kompetencën në lidhje me përshkrimin e pozicionit të punës; Eksperiencën e tyre të mëparshme; Motivimin, aspiratat dhe pritshmëritë e tyre për karrierën.