UMT pjesë e projektit Erasmus+ CBHE “SINCERE” për forcimin e integritetit akademik

Universiteti i Mjekësisë, Tiranë është pjesë e projektit Erasmus+ CBHE “Strengthening Integrity and Ethical Culture in Regional Higher Education – SINCERE”, një iniciativë rajonale e fokusuar në forcimin e kulturës së integritetit dhe etikës në arsimin e lartë në Shqipëri dhe Kosovë.

Takimi hapës (kick-off meeting) u zhvillua në Universitetin “Fan S. Noli”, ku institucionet pjesëmarrëse prezantuan rolin dhe kontributin e tyre në zbatimin e projektit.

Konsorciumi përbëhet nga nëntë institucione partnere nga Shqipëria, Kosova, Rumania, Polonia dhe Serbia.

Qëllimi i projektit SINCERE

“SINCERE” synon të krijojë një qasje të unifikuar dhe të qëndrueshme mbi integritetin akademik, përmes:

* formulimit të politikave dhe procedurave të strukturuara për integritetin akademik;

* përdorimit të mjeteve digjitale për detektimin e plagjiaturës dhe përmbajtjeve të gjeneruara nga inteligjenca artificiale;

* ngritjes së një Task Force të Integritetit Akademik në çdo institucion partner;

* trajnimeve për stafin akademik dhe administrativ mbi menaxhimin e shkeljeve etike;

* krijimit të Rrjetit Rajonal të Integritetit Akademik, i cili do të vazhdojë aktivitetin përtej afatit të projektit.

Ndikimi

Projekti pritet të sjellë përmirësim në nivel:

* individual – rritje të ndërgjegjësimit dhe kompetencave mbi etikën;

* institucional – standarde dhe procedura të qarta, transparente dhe të zbatueshme;

* sistemik – forcim të praktikave etike sipas modeleve të vendeve të Bashkimit Evropian.

Integriteti akademik është themeli i cilësisë dhe besueshmërisë së institucioneve të arsimit të lartë. UMT mbetet e përkushtuar ndaj forcimit të vlerave etike në mësimdhënie, kërkim dhe veprimtari institucionale.